Thursday 16 February 2012

फगुआ चलिए गेल

                 
फगुआ चलिए गेल




फगुआ आएल, फगुआ गेल,
फगुआ  चलिए गेल |
फगुआ खेलै लेऽ, मोन लगले रहि गेल ||




                                                 फगुआ आएल
                                                    फगुआ गेल
                                        फगुआ  चलिए गेल |
                                               फगुआ खेलै ले
                                     मोन लगले रहि गेल ||  फगुआ आएल.............



करेजाके सप्पत द
ओकरा लिखलिऐ |
दुइयो दिन के खातिर एत
अबै ले   कहलिऐ |

ओकरा पर मोन
टङले रहि गेल || फगुआ आएल.............



                               ढोल बाजल डम्फा बाजल
                                                 होइ छल गर्द |
                              एम्हर हमरा होइत रहल
                                            मीठ - मीठ दर्द |

                                                  ख-सेहन्ता 
                                              जरले रहि गेल || फगुआ आएल.............



जरल छल कपार तऽ
हम कोना हँसितौं |
ननदि आ दीयऽर संगे
खेलबे किए करितौं |

रंग - अबीर
पड़ले रहि गेल || फगुआ आएल.............



                                  मोन मारि रहि गेलौं 
                                              पीटैत   कपार |
                                पड़ले रहलौं भरि दिन
                                           बंद क केबार |

                              तै लेऽ' अर्र-दर्र  बुढ़िया
                                     बजिते रहि गेल || फगुआ आएल.............



केहेन  होइछै फगुआ
से हम ने     बुझलिऐ |
भीजि  गेलै     गेड़ुआ
हम  ततेक कनलिऐ |

तै ले ननदियो निरासी
खौंझबिते रहि गेल | | फगुआ आएल.............



                                  आब एतै मनसा त
                                         बजबो ने करबै |
                                     कतेक मनओतै 
                                    एकेटा बात   पुछबै |

                                 जे, एहन     निशोख
                                  ई किए' बनि गेल ||  फगुआ आएल.............






( १९७८ मे प्रकाशित गीत संग्रह 'तोरा अँगना मे'क गीत क्र. २४ )
संगहि “गीतक फुलवारी” मे सेहो प्रकाशित ।

       



No comments:

Post a Comment