Saturday 11 February 2012

अहाँ जँ ने अबितौं

                         
अहाँ जँ ने अबितौं








सपनो   मे   कहियो
ने  सोचने  होयब   जे,
अहाँ  केर  बिना हम
कोना  रहि  सकै छी
मिलन  केर  तरंग जे
हृदय  मे  उठइ    छल,
प्रियतम   अहाँ    केँ
कोना  कहि सकै   छी


                                   हमर   घर   अन्हारक  अन्हारे       रहैत,
                                   अहाँ जँ ने अबितौं ! अहाँ जँ ने अबितौं !!


चञ्चल             चितवन
सनक   ई      मनोरम,
अहाँ  केर    हृदय केर
उपवन  ने     रहितय ।
तऽ    अहीं          कहू
हे हमर प्राण प्रियतम,
मोनक   ई      कोइली
कहाँ  जा    कुहुकितय

             
                           ई   स्वप्नक   वसंत      असारे   रहैत,
                          अहाँ जँ ने अबितौं ! अहाँ जँ ने अबितौं !!


दू मोनक  ई हरियर
जँ धरती ने रहितय ,
तऽ  कारी  घटा  ई
कहाँ जा  बरसितय
अहाँ   केर   नोरक
जँ सागर ने बनितय,
तऽ  उमतल नदी दू
कत जा क मिलितय।


                   साओनो  मे   सुखारक   सुखारे    रहैत,
                   अहाँ जँ ने अबितौं ! अहाँ जँ ने अबितौं !!


विरहक जँ  ई तार
टूटल               रहैत,
 जिनगीक वीणा
बजबितौं       कोना ।
अधरे  मे जँ   भास
हेरायल           रहैत,
तऽ  संगीत    प्रेमक
सुनितौं          कोना


                       श्रृंगारो   बेकारक    बेकारे       रहैत,
                   अहाँ जँ ने अबितौं ! अहाँ जँ ने अबितौं !!





( १९७८ मे प्रकाशित गीत संग्रह 'तोरा अँगना मे'क गीत क्र.१७ )



No comments:

Post a Comment