मोन होइए

        

मोन होइए

मोन  होइए अहाँ केँ   देखिते  रही ।

किछु  बाजी  अहाँ हम सुनिते रही ।।

आइ आयल मिलन केर,

मधुर        यामिनी ।

बनि    बैसलौं   अहाँ,

मानिनी   -  कामिनी ।

एक युग सन लगइए एक-एक घड़ी ।

किछु बाजी अहाँ,  हम सुनिते रही ।।

आइ  आयल  हृदय मे,

आनन्दक      लहरि ।

बात  कहबाक  जे छल,

से    गेलौं    बिसरि ।

किछु फुरा ने रहल, की करी ने करी ।

किछु बाजी अहाँ,  हम सुनिते रही ।।

कोन जादू छी भरने,

अपन   दृष्टि   मे ।

जे  नहा  गेलौं हम,

स्नेह केर  वृष्टि मे ।

आब मरजी  अहीँ केर, अहीँ जे करी ।

किछु  बाजी अहाँ,  हम सुनिते रही ।।

( १९७८ मे प्रकाशित गीत संग्रह “तोरा अंगना मे” क गीत सं. ‍-- )

संगहि “गीतक फुलवारी” फुलवारी मे सेहो प्रकाशित ।

ई गीत सुरेश पंकज जी द्वार “जमाना बदलि गेलैए” आ स्व॰ हेमकान्तजी द्वारा “चल मिथिला मे चल” नामक मैथिली ऑडियो आ विडियो कैसट सभ मे नित नऽव नऽव भाष सभ मे अबैत रहल अछि ।