आइ ने छोड़ब

                                                 

आइ ने छोड़ब

फगुआ खेलथि श्रीकृष्णजी, गोपी सबहक संग |
मिथिला केर अछि फगुआ नामी, दियर - भाउज केर संग ||

 भौजी
आइ  ने  छोड़ब,

आइ   ने    छोड़ब,   भौजी

लेपब गाल मे लाल अबीर |

भैया  जँ  कतबो  तमसेता,   

कऽ   लेब  कान   बहीर    ||  भौजी ......

फगुआ   खेलथि   श्रीकृष्णजी,
गोपी      सबहक      संग |
मिथिला केर अछि फगुआ नामी,
दियर - भाउज    केर   संग ||  भौजी ........

फगुआ मे  होइते अछि अहिना,

व्यर्थ    करै   छी     लाज |

आजुक दिन रहिते अछि सभठाँ,

दियर – भाउज   केर    राज ||  भौजी .......

नवकी  भौजी पाबि अहाँ  सन,
हम   सभ   भेलौं    नेहाल |
बरख दिन केर बाद ई अवसरि,
आओत     परुकेँ     साल  ||  भौजी .......

            
     

भौजी  केहनो हो लजबिज्जी,

हम  सभ  आइ  ने  छोड़ी |

दियर-भाउज केर बीच होइछ ,

ई   पावनि   प्रेमक   डोरी ||  भौजी .......

( १९७८ मे प्रकाशित गीत संग्रह 'तोरा अँगना मे'क गीत क्र. १८ )

 संगहि “गीतक फुलवारी” मे सेहो प्रकाशित ।