की भेटल आ की हेरा गेल

की भेटल आ की हेरा गेल ( आत्म गीत )

                    (१)

एक दिन बीतल कए दिन बीतल

एक युग बीतल कए युग बीतल

कएटा वसंत            भादो बनिक'

अछि समय   सिन्धुमे समा गेल

हम सोचि       रहल छी जीवनमे

की भेटल        आ की हेरा गेल |

                    (२)

जीवन केर          आंगनमे वसंत

आयल कहियो       हंसिते-हंसिते

किछु कोंढ़ी छल से फूल बनल

झरि गेल मुदा      छुबिते-छुबिते

गुन-गुन  करइत मोनक भमरा

कांटेक दोगमे               घेरा गेल

हम सोचि रहल छी      जीवनमे

की भेटल       आ की हेरा गेल |

                   (३)

सपना पाहुन बनि क    आयल

तन्नुक सन निन्नक आंगनमे

ओ फूल जे माला बनि ने सकल

छिड़िआयल सुधिकेर  काननमे 

से  टीस  ह्रदयमे  अछि  एखनहुँँ  

किछु तप्पत सन  किछु सेरा गेल 

हम  सोचि रहल छी      जीवनमे

की  भेटल       आ  की हेरा गेल |