बाबू रे बाबू

 

बाबू रे बाबू

बेर - बेर  पूछै  छथि  कनियाँ,
धेलियै   कतऽ   रुपैया   यौ ।।

माए केर मुँह  मे  बाबू रे बाबू  !

बहिनिक  मुँह  मे  भैया  यौ ।

बेर - बेर  पूछै  छथि  कनियाँ,
धेलियै   कतऽ   रुपैया   यौ ।।  माए केर मुँह मे.........

भऽ  अति चिंतित  माए पुछैत’छि,

बौआ  बड़  दुबराएल   लगै  छऽ ।

सभ  टा   झंझट   हटबे     करतै,

एते  किए  घबड़ाएल    लगै  छऽ ।

हरथुन  सभ  दुःख  भोला   दानी ,
हरथुन   कृष्ण  -  कन्हैया   हौ ।।  माए केर मुँहमे.......

घटले  रहइन  हिनका  सभ  दिन,

साबुन     तेल    आ    चोटी ।

कखनो  जा  कऽ  बैग  तकै छथि,

ताकि    अबै    छथि    जेबी ।

भऽ  निरास माछी सन भन – भन,
करइछ    बिढ़नी    दैया   यौ ।।  माए केर मुँहमे.........

तैखन बुचिया 'माँ - माँ ' बाजलि,

लोहछलि माँ  दू - चाट लगाओल ।

सासु  बेचारी  जँ  किछु  बाजलि,

सभ  बिक्ख  ओकरे  पर झाड़ल ।

हम  गुम्म  छी,   सोचि रहल छी,
आयल   केहन    समैया   यौ ।। माए केर मुँहमे.........

भानस छोड़ि कऽ  भगली  कनियाँ,

ठोकि  केबाड़  खाट  धऽ लेलनि ।

भऽ  उदास माए हारि - थाकि कऽ,

भनसा - घर केर बाट पकड़लनि ।

भानस बनल - कियो नञि खेलक,
खा  गेल   सऽभ   बिलैया  यौ ।। माए केर मुँहमे.......

मोन  पड़ैत'छि   हिनकर   चिट्ठी,

लिखलनि जे  “श्री प्राणनाथ जी” ।

एना  किएऽ  हमरा  बिसरल  छी,

से  पढ़लौं  आ  इहो  देखइ छी ।

पति - पत्नी  केर  बीच आबि  कऽ,
सौतिन    बनल    रुपैया   यौ ।।  माए केर मुँहमे.........

भारी    संकट   मे   पड़ि   गेलौं,

एक दिस घर आ एक दिस कनियाँ ।

तीत – मीठ्ठ   अनुभव  करइत  छी ,

माए  केर ममता,  बहु केर दुनियाँ ।

सोचि  रहल  छी  एना  कते  दिन,
चलतै      जीवन – नैया     यौ ।।   माए केर मुँहमे.........




                           

( १९७८ मे प्रकाशित गीत संग्रह 'तोरा अँगना मे' केर गीत क्र. २८ )

संगहि “गीतक फुलवारी” मे सेहो प्रकाशित ।