चलि जो रे पाँती

 

चलि जो रे पाँती

चलि जो रे पाँती ! साजन केर गाम

चलि जो रे पाँती ! साजन केर गाम

कहियन्हु  हुनका     हम्मर  प्रणाम ।

मोन पाड़ि दीहनु सासुर के बाट-घाट

मोन पाड़ि दीहनु अभगलीक नाम ।। ......



                                                     पुछिहनु हुनका जे रूसल किएक   छथि,

                                                     हमरा बिसरि चुप्प बैसल किएक   छथि,

                                                     पठौलनि  ने मिसरी  आ ने    खटमिट्ठी,

                                                     ने देलनि समाद आ ने लिखलनि चिट्ठी,



की ने पड़नि मोन - रातियो चतुर्थीक

की ने भेटै छनि  लिफाफोक दाम ।। ........



                                                     कहलनि  अहाँ  चान हम  छी चकोरी,

                                                     टूटत  ने  कहियो पिरीतिक   ई   डोरी,

                                                     मोन  मे  आशाक  गुड्डी     उरौलनि,

                                                     संग-संग कतेक नव  सपना सजौलनि, 



प्रेमक पथ पर दौड़ाय   -  आब किए ,

पाछाँ घिचै  छथि  पकरि कऽ लगाम ।। .......



                                                      करइछ किलोल आइ आँखिक पिपासा,

                                                       चूर - चूर  भऽ  गेल    मोनक बतासा ,

                                                       पाथर  करेज  केँ     तोँ   पिघलबिहेँ,

                                                       मिझा  गेल  बातीकेँ फेर सऽ  जड़बिहेँ,



कहिहनु बेकल छथि  -  जंगल मे सीता,

जल्दी सऽ चलियौ यौ अयोध्याक राम ।।.........

( १९७८ मे प्रकाशित गीत संग्रह 'तोरा अँगनामे'क गीत क्र. १२ )

 संगहि “गीतक फुलवारी” मे सेहो प्रकाशित ।