से फगुआ खेलायत कोना कऽ

से फगुआ खेलायत कोना कऽ

जकरा   सोझाँ   मे    नेना  कनै  छै ,
 “माँ  की  खैब ?  भूख अछि लागल” ।
 से   पूआ    पकाओत      कोना   कऽ,
जकरा  आँगन  वसन्त  नहि  आयल ।।

छै  जेबी    जकर     खाली – खाली,
आ   खरची   घरक    लटपटायल  ।
से  फगुआ  खेलायत   कोना   कऽ,
जकरा आङन  वसन्त नहि आयल ।।

बीस बरखक तपस्या तऽ कैलक तखन,

भेटलैक      बड़कीटा         डीगरी ।

से दर - दर के ठोकर खेलक       मुदा,

नहि   भेटलैक      एकोटा   नोकरी  ।

जकर  स्वप्नक  महल    ढहि  गेलै,
छै   आशा - कमल         मुरुझायल ।
से  डम्फा   बजाओत     कोना  कऽ,
जकरा आङन वसन्त  नहि आयल ।।

दऽ  आयल  कते  ठाम   औना – पथारी,

ने  भेटलैक  पैंचे,  ने  भेटलै     उधारी ।

ने घर मे छै चुटकी भरि मड़ुओ खेसारी ,

की करतैक भानस,  से चिन्ता छै  भारी ।

बेकल भऽ* कनैत छैक  गृहणी  बेचारी,

कतऽ छह  बैसल  हौ  कृष्ण – मुरारी !

जकरा   सोझाँ   मे    नेना  कनै  छै ,
 “माँ  की  खैब ?  भूख अछि लागल” ।
 से   पूआ    पकाओत      कोना   कऽ,
जकरा  आँगन  वसन्त  नहि  आयल ।।

नूआ छै  गुदरी  आ  धोती   छै   फाटल,

बौआक  अंगा पर  चिप्पी  छै  साटल  ।

बाँचल   छै   जकरा      घऽरे - घरारी ,

से कीनत कोना  नऽव धोती आ साड़ी ।

जकरा   रहबा  लेऽ   एकटा   मड़ैया ,
आ    मड़ैया    सेहो    ढनमनायल ।
से   रंग    उड़ायत     कोना    कऽ,
जकरा  आङन  वसन्त  नहि आयल ।।

जकरा   रहबा  लेऽ   एकटा   मड़ैया ,
आ    मड़ैया    सेहो    ढनमनायल ।
से   रंग    उड़ायत     कोना    कऽ,
जकरा  आङन  वसन्त  नहि आयल ।।

* Original print मे “बेकल भऽ” केर स्थान पर “शोकाकुल” शब्द आयल अछि, जे कि बाद मे हमरा युक्तिसंगत नञि बुझना गेल । “शोकाकुल” शब्द मैथिली मे प्रायः ककरो मृत्युक सन्दर्भ मे प्रयुक्त होइत अछि । तेँ आगाँ केर लेल एहि ब्लॉग पर देल गेल परिवर्तित पाठ केँ ग्राह्य मानल जाए ।

( १९७८ मे प्रकाशित गीत संग्रह “तोरा अङना मे” क गीत क्र. २२ )

 संगहि “गीतक फुलवारी” मे सेहो प्रकाशित ।