ससुर अँगनामे

  

ससुर अंगना मे

घुमा दियनु हे ! ससुर - अंगनामे |

नहू - नहू चलियौ दुल्हा

जोर  सँ  ने      चलियौ 

एखने  सँ  कनियाँ केर

हाथ        ने       छोड़ियौ

धरा दियनु हे ! ससुर - अँगनामे |

देखब   दुल्हा         कहियो

हुएऽ         ने              गलती

अपने     चलबै       आगाँ

कनियाँ पाछाँ-पाछाँ चलती

सिखा दियनु हे ! ससुर - अंगनामे |

पोथी  मे  ने    भेटत दुल्हा

एहेन                        गियान

जिनगी भरि मे संगी एहेन

भेटत       क्यो   ने      आन

लिखा दियनु हे ! ससुर - अंगनामे |

देखब दुल्हा       कहियो

ई  संगी    नहि  छूटय

सासुरक बान्हल प्रेमक

डोरी   ने     ई   टूटय

बन्हा दियनु हे ! ससुर - अंगनामे |

देलहुँ     अमोल     धन

राखब           जोगाकए

बड़              पछतायब

एकरा            गमाकए

बुझा दियनु हे ! ससुर - अंगनामे |

वर -  कनियाँ        होइए

एके गाड़ी कए दू पहिया

हैत     बड़         कचोट

बिसरबै    ई       जहिया

रटा दियनु हे ! ससुर - अंगनामे |





( १९७८ मे प्रकाशित गीत संग्रह “तोरा अँगनामे” क गीत क्र. ७ )