गीत कोना कऽ गाबी / मैथिली गीत

                          

गीत कोना कऽ गाबी

एहेन  हाल मे कानि  सकै  छी,  गीत  कोन कऽ  गाबी ??

गोली - बारूदक  मौसम मे, हम  कविता  केहेन सुनाबी ?
हाल  देखि  बे-हाल  भेल  छी,  गीत कोना कऽ   गाबी ??



गाम - गाम आ शहर – शहर मे, आतंकक अछि    छाया ।
ठोहि पारि कऽ  कानी रहल अछि, गौतम  बुद्धक  काया ।
शब्द - शब्द सँ  चिनगी उड़इछ,  शब्द - शब्द सँ धधरा ।
अपनहि घर,  हम जड़ा रहल छी,  अपन - अपन बखरा ।

गामक - गाम  जरैए  धह - धह,  ककरा कोना बचाबी ?
एहेन  हाल मे कानि  सकै  छी,  गीत  कोन कऽ  गाबी ??



टूटल   सरस्वती   केर,  वीणा  केर     संगीतक  धारा ।
मनुखक छुद्र  स्वार्थ पर कनइत,  अछि विज्ञान बेचारा ।
पत्रहीन, सभ गाछ  नग्न अछि,  जेम्हरे  देखू      तेम्हर ।
कतऽ  अलोपित भेल  गाम सँ,  बऽड़क गाछ     झमटगर ।

थाकल - हारल  लोक  सोचैए,  कतऽ   कने   सुस्ताबी ?
एहेन हाल मे  कानि सकै छी,  गीत  कोना कऽ  गाबी ??



बेर - बेर    उठबैए   हाबा,      एखनो   वैह   सवाल ।
बुद्ध – महावीरक   ई   धरती,  एहेन   कियेऽ    कंगाल ।
द्रोण - भीष्म केर चुप्पी आ  धृतराष्ट्रक   कुत्सित  सपना ।
बेर – बेर - दोहरैल जाइत अछि,  लाक्षा-गृह  केर घटना ।

उचित  यैह  जे  आमक खातीर,  आमक  गाछ लगाबी ।
चलै चलू हम सभ हिल-मिल कऽ,  अपन बिहार  बचाबी ।।






(परिप्रेक्ष्य / सन्दर्भ - ओहि समयक मिथिला सहित सम्पुर्ण बिहारक दुरावस्था)
( रचना : सिवान / २२.०२.१९९२ )