सऽमधि एला बनि-ठनि कऽ / मैथिली गीत -डहकन

सऽमधि एला बनि-ठनि कऽ

सऽमधि एला बनि - ठनि कऽ 

धोती - कुरता   पहिरि   कऽ 

                                 एला डहकन  सुनऽ बेटाके बियाहमे |

हम  सब   करै  छी   पुछारि 

बाजू  गीत  सुनब  कि  गारि 

                                 आ कि उलहन सूनब बेटाके बियाहमे |

ककरा  सँ माँगि कऽ धोती पहिरलौं

ककरा   सँ   लेलियै    कुरता, 

ककरा सँ लेलियै पाग आ मिरजइ

ककरा   सँ   लेलियै    डोपटा, 

के..हेन अछि छोटका ख..न..दान ^*

घिने..लौं  मुइलो  बापक  नाम 

                                तेँ तँ उलहन दै छी बेटाके बियाहमे |

लाजो  ने  भेल जे टाका गनेलियै 

बेटाकेँ बेचि  कऽ  खेतो किनलियै 

कहू  तँ  कारी - चून  लगा  दी 

अहाँ  केँ  गदहा  पर  बैसा  दी 

                                गामक परिछन करब बेटाके बियाहमे |

पएरमे  बेमाए  अछि   फाटल

तँ  कोना कऽ एलियै यौ बूढ़ा, 

दाँत  अछि  एको  ने  बाँचल

तँ  कोना   चिबेलियै   मूड़ा,

अजगुत    लऽगैए    गे   दाइ !

बुढ़बा  टुप - टुप  खेने  जाइ !

                              बुढ़बा मारल जेतै बेटाके बियाहमे |

 * छोटका ख..न..दान = छोट / निकृष्ट विचारधारा बला खनदान = एहि पाँतिक जातिगत वर्गीकरण सँ कोनहु लेन – देन नञि थिक

( रचना : १९७६ : शशिकान्तजी - सुधाकान्तजी द्वारा विभिन्न मंच पर प्रस्तुत कयल गेल )