कहने तऽ जाउ

                      

कहने तऽ जाउ

बात कहलौं  कते,  ने बिगड़बै अहाँ ।
मुदा जाइते ने सभटा बिसरबै अहाँ ।
                     से कहने तऽ जाउ फेर कहिया एबै ?
                                                         कहिया एबै ?



ओहू  बेर,   कते   हम  केलौं    नेहोरा ।
मुदा   अहाँ,  पत्रोक  ने  देलौं  उतारा ।
सेहन्ता   हमर,  ने   बुझलिऐ   अहाँ ।
फगुओ सन के पावनि,  ने एलिऐ अहाँ ।
आश केर  फूल सभ,  झहरि गेल छल  ।
अहाँ  बिना  मोन तऽ,  हहरि गेल   छल ।
हम  कनलौं  कते,  ने  देखलिऐ   अहाँ ।
गारि  पढ़लौं  कते,  ने  सुनलिऐ   अहाँ ।

                    से सप्पत हमर खाउ ,

आ कहने तऽ जाउ फेर कहिया एबै ?

                                   कहिया एबै ?

बिना  पुरुष  केर, मौगीक  जिनगी   पहाड़ ।
बड़  डेराओन  लगैत अछि,  रातुक अन्हार ।
पाबि एसगर मे, राति भरि कनैत रहि गेलौं ।
कऽ  बोखार केर लाथ, हम सहैत रहि   गेलौं ।
एना  करबै जँ  फेर,  हम सहि ने   सकब ।
कहि दै छी साफ–साफ, चुप्प रहि ने सकब ।
आगि  देह मे लगाय, बुझू  जरि जैब  हम ।
ने तऽ खा लेब माहुर, आ मरि  जैब    हम ।

                          अहूँ ततबे मनाउ ,

        ने तऽ कहने तऽ जाउ  फेर जल्दी एबै ?

                                             की नै एबै ?

ओना मोनमे तऽ कखनो कऽ,  होइए  उमंग ।
जे थोड़बो दिन लेऽ,  हमरो लऽ चलितौं संग ।
अहूँ  हमरो अछैते,  तऽ  कष्ट   कटइ  छी ।
व्यर्थ  होटल मे,  पाइ  ओते  नष्ट करै छी ।
हम  कथू  लेऽ  अहाँ  केँ,  ने  तंग  करब ।
आर  चाही  की  हमरा,  जँ   संगे  रहब  ।

से ई अर्जी हमर,

          आ  मर्जी अहांक,

     चलू जल्दी सुनाउ जे की करबै ?

                 संग लऽ चलबै,

                                कि नै लऽ जेबै ?

( १९७८ मे प्रकाशित गीत संग्रह 'तोरा अंगनामे'क गीत क्र.२५ )

संगहि “गीतक फुलवारी” मे सेहो प्रकाशित ।