कक्का मारल गेला सौराठक मैदान मे

         

कक्का मारल गेला

कक्का   मारल   गेला ,
                                   सौराठक  मैदान  मे ।
                                  पहिले कन्यादान मे ।।


भरना रखलनि खेत – पथार,
टाका  गनलनि दऽस हजार ।
तै  पर  दू सोड़हि वरियाती,
अयला बनि-बनि घोड़ा-हाथी ।

महिसो  बेचऽ   पड़लनि  रसगुल्ला  केर  दाम मे ।
                                  वरियातीक सम्मानमे ।।
भेलखिन “अप टू डेट” जमाइ,
समधि   से   नमरी  कसाइ ।
कोनो  ठाँ  हुए    ने  हिनाइ,
सँठलनि  खेतो   बेचि बिदाइ 

तइयो  रुसिए  गेलखिन  समधिन  समधियान मे ।
                                        कोजगराक मखानमे ।।


तै  पर  दाही    से घमसान,
ने हेतनि एको चुटकी धान ।
छटपट-छटपट करनि परान,
कथी पर जीतै   सभ संतान ।

की करता ? माथ हाथ धए बैसल छथि खरिहान मे ।
                                         जड़ाउरक ओरिआनमे ।।


समधियो  पौलनि    जतबा टाका,
भेलनि  रमन - चमनमे   खरचा।
नफ्फा  बस  एतबे  टा    भेलनि,
समधिक घर उजाड़िकऽ छोड़लनि ।

सभटा  टाका  चलि  गेल    बनियाँ केर दोकान मे ।
                                           पूरी आ पकवान मे ।।


अछि तऽ सभहक  घरमे       बेटी,
सभ क्यो मिलि एखनो जँ चेती ।
तखने  मिथिला  फेर    चमकती,
तखने  मैथिलियो  हँसि   सकती

अत्यावश्यक  अछि  परिवर्तन तिलक - विधान मे ।
                                         सौराठक  मैदान  मे ।।

( १९७८ मे प्रकाशित गीत संग्रह 'तोरा अंगनामे'क गीत क्र.१० )

संगहि “गीतक फुलवारी” फुलवारी मे सेहो प्रकाशितएहि गीतक भाष निम्न प्रकारेँ अछि आ अही भाष पर शशिकान्तजी आ सुधाकान्तजी द्वारा विभिन्न मैथिली मञ्च सभ पर आ हर आङ्गन मे पिछला ३५ – ४० वर्ष सँ लोकगीत जेना गओल जा रहल अछि

कक्का   मारल   गेला ,

                                 सौराठक  मैदान  मे।
                           पहिले कन्यादान मे (ना)।।

“(ना)” केर वस्तुतः कोनो अर्थ एहि ठाम नञि थिक, ओ बस भाष मिलएबाक लेल प्रयुक्त होइछ ।                                 

ई गीत एकटा अलग भाष मे चन्द्रमणि जीक ऑडियो कैसेट “दरभंगा बजार” मे सेहो सुनबा मे आयल ।