किछु नै भेल

                       

किछु नै भेल

मोटका - मोटका पोथी पढ़लहुँ,
पोथी  केर सभ पन्ना रटलहुँ,
से सभ रटि कऽ किछु नै भेल |

पहिने  जोड़ी जोड़ दशमलव
आब जोड़ै छी नून आ तेल ||  मोटका - मोटका पोथी .....

कनिएँ  बढ़लौं  तऽ  बूझऽ  लगलौं,

की थिक भाषण, की थिक शासन ।

आब  तऽ भरि  दिन  इएह बुझै छी,

की थिक  बासन  की थिक रासन ।

पहिने हाथ रुमाल रहै छल
आब  हाथमे  झोड़ी  लेल ||  मोटका - मोटका पोथी .....

पहिने   मोन  रहय  जीहे  पर,

कहिया  कतऽ   कथीक  चुनाव ।

आब  तऽ भरि  दिन मोन रहैए,

चाउर – दालि - आँटा केर भाव ।

पहिने हाथ मे कलम रहै छल
आब हाथ मे छओ नमरी * लेल ||  मोटका - मोटका पोथी .....

 पहिने  रहय  प्रवल   जिज्ञासा,

के छथि  कोन  दलक लीडर ।

आब करै छी कोशिश चीन्हक,

के छथि  मुखिया  के  डीलर ।

पहिने हमहूँ खेली फगुआ
आब मात्र खेली धुरखेल ||  मोटका - मोटका पोथी .....

पहिने पढ़लौं “क्या और कहाँ” मे,

सोना - चानीक   कतऽ   खान ।

आब  जनै  छी   कतऽ   कतऽ,

सरकारी     कोटक    दोकान ।

पहिने खेली खेल ताश केर
आब खेलै छी कर्मक खेल || मोटका - मोटका पोथी .....

पहिने  छल   डीग्रीक  सेहन्ता,

आब अछि नोकरी  केर चिन्ता ।

खेतो सब अछि पड़  गेल भरना,

बिका गेलनि कनियाँ केर गहना ।

हम छगुन्तामे पड़ले छी
हे परमेश्वर ई की भेल ?  मोटका - मोटका पोथी .....

पहिने विपत्ति पड़इ  तऽ लोकक,

मदति  करैत     छला  भगवान ।

आब कतबो हर-हर बम-बम कहू,

देथि ने  शिवशंकर  जी ध्यान ।

आइ कृष्ण गोवर्धनधारीक
चक्र - सुदर्शन कत्तऽ गेल ?  मोटका - मोटका पोथी .....

* छओ नमरी = पहिने छओ नम्मर केर कोदारि अबैत छल ।

( १९७८ मे प्रकाशित गीत संग्रह 'तोरा अँगना मे'क गीत क्र. २० )

संगहि “गीतक फुलवारी” मे सेहो प्रकाशित ।