रास रचलक ई दुनिया हमर दुनिया

गजल

रास रचलक ई दुनिया, हमर दुनिया

गीत गजलक ई दुनिया, हमर दुनिया

शांति तकलक ई दुनिया, हमर दुनिया

फूल कमलक ई दुनिया, हमर दुनिया

लोक सूतल जे छल भांग खाक’ बहुत

नाक दबलक ई दुनिया, हमर दुनिया

लोक जागल जे छल नाचमे बाझल

नाम गनलक ई दुनिया, हमर दुनिया

लोक टूटल जे छल भीड़मे  छूटल

ताकि अनलक ई दुनिया, हमर दुनिया

लोक करजामे डूबल हजारो जत’

हाल जनलक ई दुनिया, हमर दुनिया

लोक भागल जे छल रूसि कय गामसं

नेह बँटलक ई दुनिया, हमर दुनिया

( मात्रा-क्रम : 21222-221222)

(तेसर शेरमे दू टा लघुकें दीर्घ मानल गेल)

 v