दोहा

 

दोहा :    

 

                               1.

सभ छथि दुनियामे अपन, कतहु कियो नहि आन

इएह सोचि सदिखन  करी, हम  सबहक  सम्मान |

                2.

स्नेह-सुधा, शुभकामना, सम्मति सबहक लेब

मोन, बचन आ कर्मसं, दुःख ककरो नहि देब |

                3.

प्राप्त करू पुरुषार्थसं  अनुचित-उचितक ज्ञान

लेखक अहांक भाग्यकेर और कियो नहि आन |

                               4.

नहि ओझा, नहि ज्योतिषी अथवा कोनो यंत्र

मनकें आनंदित करय क्षमा थीक ओ   मन्त्र |

                   5.

सबहक दुखमे संग हो, राखय सबहक लाज

सबहक हित-चिन्तन करय,तकरे नाम समाज |

                   6.

जहिना सगरो विश्वकें ज्योति देथि आदित्य

चिंतन सबहक हो जतय, सएह थीक साहित्य |

                    7.

जे नहि पोसथि मोनमे कोनहु अशुभ  विचार

‘अनिल’ एहि संसारमे वएह परम  बुधियार |

                                8.

भ’ जायत आसान ओ, करब जकर अभ्यास

जीवनमे सुख-शान्तिले’ सदिखन करू प्रयास |

                        9.

थिक कविता केर लक्ष्य की, उल्लासक संसार

सबहक जीवनमे बहय,    आनंदक  रसधार |

                  

                            10.

तन मन धन सभ स्वस्थ हो, कविता राखथि ध्यान

कविता  सूनब  थीक करब,  गंगामे असनान |

                 

                                     11.

कविता त गंगा थिकी, सबहक हरथि कलेश

कविक मोनमे बास करथि ब्रह्मा,विष्णु,महेश |

                 

 

                12.

भूमि,भवन,लाकर तथा अन्न-जलक भण्डार

चित्त शांत  त ठीक सभ,नै त सभ बेकार |

 

              13.

मिथ्या शान-गुमानसं, करै जाउ परहेज

कन्यादानक यज्ञमे, राक्षस थीक दहेज़ |

               14.

हो व्यभिचारक अंत आ सदाचारके जीत

सभ मनमे उल्लास आ स’भ ठोर पर गीत |

                15.

आवश्यक की अछि की नहि अछि जे राखथि ई ध्यान

‘अनिल’ एहि  संसारमे, हुनकहि  कहब  महान |

                                  16.

कहुना क’ धन जमा करू आ कीनू बंगला, कार

भोज खाउ आ अहूँ खुअबियौ, इएह थीक संसार ?

                                17.

की थिक रामायण आ गीता, की थिक वेद,पुराण

‘खट्टर कक्का’सं  सुनू,  रावण कोना  महान |

 

                  18.

मनकें आनंदित करय, दिअए शान्ति, विश्राम

दोहा, कविता, गीत, गजल, हमर ई चारु धाम |