आँखिमे चित्र हो मैथिली केर: तोरा अङनामे

Thursday, 28 October 2021

वसंत नेने

आएब सजना, तोरा अङनामे |

पीयरे ओहार बिच लाले रंग डोलिया

ताही बिच कुहुकय प्राण कोइलिया

तोरेले’ पराती

सुनैब सजना, तोरा अङनामे |

आशक पातिल प्रेमक बाती

देखि जुडायत दगधल छाती

सपने जकां कोहबर

सजैब सजना, तोरा अङनामे |

सेज सजायब कल्पित उपवन

करब निछाउर तन-मन-यौवन

नीलगगन-सन

बनैब सजना, तोरा अङनामे |

नोर बहाकय थाकलि नयना

उछिलय सिनेहक गंगा-यमुना

संगे-संगे जी भरि

नहैब सजना, तोरा अङनामे |

(गीत संग्रह 'तोरा अङनामे' 1978 मे प्रकाशित )

आँखिमे चित्र हो मैथिली केर