महाभारत आ हम

                                  महाभारत आ हम

(कविता)

भोरे  उठि

सब दिन

करैत छी संकल्प

विदुर जकाँ जीबाक

अपन जीवन

आ

दस बजैत - बजैत

शुरू भ जाइत अछि महाभारत

टूटि जाइत अछि हमर संकल्प

बिसरि जाइत छी अपन कर्तव्य

बन्न भ जाइत छी हम

एकटा छहरदेबालीमे

अपनहि कोनहु पाखंडक

भ जाइत छी दास

आ पांच बजैत - बजैत

पबैत छी

अपनाकेँ

कुरुक्षेत्रक कातमे

पड़ल शरशय्या पर

बेचारा

भीष्म पितामह- सन |

( प्रकाशित : मैथिली पत्रिका आरम्भ, पटना, अंक २४ / जून २०००   )